|
Першы летнік пад кіраўніцтвам БАСА 2011 |
Днямі скончыўся чарговы летнік Беларускай асацыяцыі студэнтаў-
архітэктараў. Каб трапіць сюды на архітэктурным факультэце
БНТУ быў сапраўдны конкурс (трэба было зрабіць што заўгодна па
тэме “каардынаты”), а апынуўшыся тут, студэнты не толькі выдатна
папрацавалі, але і сумелі стварыць свой свет, поўны розных забаў,
прыемнага адпачынку і шчырых адносін.
З 6 па 17 ліпеня ў Любчанскім замку па спісе налічвалася 30
валанцёраў-архітэктараў. Па выходных прыязджала яшчэ шмат
іншых даўніх прыхільнікаў Любчы. Дзяжурныя не спраўляліся
гатаваць ежу на такое валанцёрскае войска, некаторыя
прыезджыя вырашалі жыць у палатках – агульная колькасць
валанцерау дасягала 50 чалавек. І гэта спрыяла больш зладжанай і
прадуктыўнай працы, а таксама весялейшым сумесным вечаровым
і начным пасядзелкам – кожнаму было з кім сустракаць світанне…
Было зроблена шмат працы, кіраўнік Фонда Іван Антонавіч
Пячынскі застаўся задаволены як ходам прац, так і іх якасцю.
Не было тых, каго прыходзілася ўгаворваць ці прымушаць, – усе
добраахвотна стараліся на карысць хутчэйшага ўзнаўлення замка.
Валанцёры працавалі па восем гадзін на дзень , з двухгадзінным
абедам, пад час якога яны паспявалі і падсілкавацца, і адпачыць, і
пакупацца і сплавіцца па Нёмане.
Варта коратка ўзгадаць, што было зроблена. Нарыхтавана 6000
цаглін, паўднёва-заходні схіл спланаваны і выкананы на 30%, вяліся
працы па забудоўцы сцяны. Тыдзень праводзіліся архітэктурныя
раскопкі пад кіраўніцтвам Андрэя Анатольевіча Мяцельскага. У
Кутняй вежы дзяўчаты ачышчалі ад вапны цэглу і даводзілі да ладу
швы. Выконваліся працы па гідраізаляцыі вежы. Рабілася шмат па
добраўпарадкаванню тэрыторыі.
Напрыканцы распавяду пра апошнія выходныя валанцёраў
летніка БАСА. Тое, што купаліся, сплаўляліся па Нёмане, скакалі
з разбегу ў ваду на крутым пясчаным беразе ракі – само сабой
разумеецца. Субота – банны дзень дзяўчат (у хлопцаў для гэтага
чацвер), таму ўсе яны адправіліся знаёміцца з мясцовай экзотыкай
у выглядзе бані пасёлка Любча. А ўвечары з канцэртам нечакана
завітаў гурт “Босае сонца”. Яго ўдзельнікі – самі былыя студэнты-
архітэктары, таму выступаць, па іх словах, перад “сваімі”, ды
яшчэ “ў такім месцы” ім было надзвычай прыемна. Пасля выступу
музыкі не вытрымалі і таксама выкупаліся ў рацэ. А валанцёрская
весялосць працягвалася ўсю ноч – вогнішча, спевы пад гітару, шмат
хто застаўся сустракаць світанне. Нядзеля – законны выходны
– была таксама прысвечана адпачынку. А на вечар смажыліся
шашлыкі, дзяўчаты-дзяжурныя спяклі пяць яблычных пірагоў. На
вуліцы быў падрыхтаваны адмысловы бар для крамбамбулі.
Многія валанцёры абяцалі прыехаць зноў. А наступны летнік, які
арганізоўвае Дабрачынны фонд “Любчанскі замак”, пачнецца 4
жніўня. Кіраўніцтва Фонда заклапочана тым, што сярод людзей,
якія падалі анкеты, мала тых, хто мае хоць невялікі вопыт кладкі
цэглы, тынкавання (а гэта будзе адной з самых важных спраў
будучага летніка). Таму валанцёры, якія могуць рабіць такую працу,
будуць прымацца без конкурсу
Ніна Шчарбачэвіч
|
